沪剧唱词《阿必大》巧斗雌老虎 剧本唱词

沪剧《阿必大》巧斗雌老虎 剧本唱词

（婶唱）听说必大受折磨，好比钢刀刺胸膛。阿侄囡是我一手抚养大,像亲生女儿差不多。只因去年丈夫死，少吃呒穿日难度，也是羊吃干枯没奈何,狠狠心肠拨伊做养媳妇。只怪我当初耳朵软,听信媒人许卖婆，讲得花好稻好样样好,说婆妈吃素念弥陀。我想留在我身边受尽苦,倒不如到李家投生路，到今朝我走错一步后悔多。再一想眼见事体方为实，小囡闲话勿作数，亲自到李家跑一趟，是非就能分清楚。要是亲家母真个不讲理，哼！不客气，我也不是好欺侮。常言道，有理能够打太婆，我要领伲必大转门户。三步并作两步走，大路不走抄小路。匆匆来到李家宅，穿竹林,小桥过，踏进场角看清楚，见有一个姑娘喂鸡食，只见她面黄肌瘦骨头露，果然是我侄女阿必大。必大！

（必白）婶娘！

（婶白）哪能啦？

（必白）我痛！

（婶白）给我看看。是给婆阿妈打格？阿大讲得不错，小姑娘是在吃苦受罪。婶娘养侬迪能大,勿要说打,就是重话也舍不得讲一声。早晓得侬要受迪种苦，我决不会放侬过来。勿要哭，婶娘是来领侬回去格。

（必白）领我回去？婶娘，快走吧！

（婶白）勿要心急,就是要走也要去对侬婆妈讲一声。

（必白）对伊讲了,伊勿肯放格。刚刚哥哥就拨伊打过。

（婶白）侬哥哥年纪轻，作兴有啥粗话俗语得罪婆阿妈，所以动手动脚。婶娘是搭伊讲道理,量伊不敢碰我半根汗毛。必大，侬到李家来得明，去也要去得清。侬去叫侬婆妈出来，说婶娘来啦！勿要怕，有我。

（必白）婆阿妈！

（婆内声）做啥？死货色，又要讨打啦！

（婶白）老太婆倒凶格。必大，侬声音放响一点，讲婶娘来啦！

（必白）婶娘来啦！

（婆白）啥？

（必白）是我婶娘来啦！

（婆白）喔，我来啦！

（唱）听说婶娘到,心里别别跳,她是人称茄人头，嘴巴会讲好像鹦哥叫，手指头粗来好像小锂刀。平常不出门，今朝前来到，一定是阿大回家把救兵讨，我讲闲话要当心好，当心好。

（白）必大啊，乖囡，侬婶娘在哪里呀？说我婆阿妈来迎接。

（必白）噢，婶娘，婆阿妈来接侬啦！

（婆白）喔,婶娘！

（婶白）女亲家，侬好啊？我真担心侬,像一口气回不转来。

（婆白）婶娘，难得侬有功夫来,倒是杨和尚下山！

（婶白）杨和尚下山，侬想砍我头刀？

（婆白）不！侬是难得来格。立客难当，请到里厢去坐坐。

（婶白）请！

（婆白）请！婶娘难得请过来，请侬立正,我要搭侬见一个礼。

（婶白）免了，免了！

（婆白）要格！要格！婶娘,侬来末，前几天拨一个信来，我好准备三吹三打来接侬。今朝突然来真是怠慢。?屋里厢，灶君、家堂、门神、土地，全好了伐？

（婶白）亲家，我问侬好勒伐？

（婆白）我好勒。

（婶白）侬真个好勒？我看侬勿大好，像大骱勿活络来，像得仔羊癫风。

（婆白）呒没呀！就是前一日，一只酱缸晒了屋浪厢，勿啥能碎了，我用扶梯爬上去拿，勿当心合扑跌仔一跤。格咾一只大骱骨跌伤了，迪两日走起路来勿便当来。

（婶白）女亲家，侬要当心啊！年纪大哉,跌下去落勿起来就讨厌哉！

（婆白）必大啊！掇凳。

（必白）噢！

（婆白）必大啊，倒茶！必大啊，去烧点心！

（婶白）必大,勿要忙，婶娘十几个月呒没看见侬，来,蹲勒我

（身边，让我好好看看侬。女亲家，勿要客气,我屋里吃饱仔来格。

（婆白）喔，吃饱仔来格，再吃一点。必大,去烧几只水潽鸡蛋。

（婶白）格末我也勿客气哉！

（婆白）啥人要侬去烧！我自己去弄。哚哚……

（婶白）女亲家，侬做啥呀？

（婆白）我想烧两只水潽鸡蛋，格咾去候候看。

（婶白）女亲家，勿要去候啦，两只鸡小来，勿像会生蛋。

（婆白）勿，两只鸡，面孔红咚咚哉！哚哚……

（婶白）人家话，满园小鸡红咚咚，勿晓得哪一只好做种。女亲家，勿要去糟蹋啥啦,我是孤孀妈妈，过来之人，必大爷叔过世辰光,我也会绷场面，吃脱仔十几板豆腐，欠的铜钿直到现在还没有还清。亲家，侬也勿要绷场面，我是勿会来扰侬格！

（婆白）扰？扰是绕豆腐皮素菜，是丧羹饭。伊倒刁啦,我要翻翻本！坐呀！

（婶白）侬也坐！

（婆白）大家坐。爷叔过世几何日脚？

（婶白）已经一年啦。

（婆白）喔！一年啦！真是前世修来格好福气。

（婶白）亲家，死了当家人，哪能是前世修来格好福气？

（婆白）喏！像我夫妻成双末，吃饭同台，安置同房，有事末要同当家人商量，望亲眷末也要成成双双,不像侬死了当家人末倒是清清爽爽，自作主张，跑东跑西呒人讲，迪个勿是死了当家人好福气啊！

（婶白）侬眼红末也好跟上来！

（婆白）婶娘，今朝来有啥事体？

（婶白）无事不登三宝殿，一则来望望女亲家;二来末，为了我的阿大，刚刚来得罪了侬伯母，千万看在我面上，不要生气，阿大迪格小囡从小死了爷娘,呒人管教，开口就骂，动手就打,真是无规无矩，这些年纪真是活在狗身上。

（婆白）嗯,婶娘提起小尊舅末，我是要向侬讲讲明。常言道，亲眷来往不坐厅堂,便坐厢房,伊躲在羊棚里,算啥个名堂？我对伊说说末，伊嘴巴不清不爽，所以我就轻轻拍了几记。再一想，我是长辈，去搭小囡淘啥气。好吧，现在骂也骂过，打也打过，也就算数！

（婶白）是呀，穷人家小囡，给人家打打骂骂是惯常格！亲家,我今朝来还要搭侬商量一桩事体。我自己男女勿养,所以我把必大当作自己女儿。明天是伊爷叔周年，要掇脱一只灵台，我想叫必大回去叩几个头，住几天。

（婆白）要必大回去住几天？明朝是爷叔周年,掇灵台是桩大事体。

（婶白）是啊，侬说好伐？

（婆白）掇灵台是大事体,照理是好去格……

（婶白）好去格？必大,跟婶娘回去。

（婆白）慢,婶娘！勿要性急，听我说。常言说，水牛屎垩田勿壮，女人家说话勿当。若要领必大回去，等伊拉公阿爹回来发放。

（婶白）男亲家勿在府上？到啥地方去了？

（婆白）出门贩猪猡去了。

（婶白）今朝能回来吗？

（婆白）呒没一定，今朝勿来，明朝……

（婶白）明朝勿来呢?

（婆白）清明汛再勿来,等到七月半,冬至十月朝。大年夜总会回来格!

（婶白）请问男亲家今年多少岁寿？

（婆白）今年四十九,明年五十岁。

（婶白）快五十岁人啦，还在外面贩猪猡，真辛苦啊！

（婆白）是呀！要赚几个铜钿呒没办法。

（婶白）亲家！侬胆子也太大呀,哪能放伊一把大年纪格人出门去，如果上船落船,头一晕、眼一花、腿一软，往河里一窜，氽仔长江，搁仔桥桩，死在外面尸首也收勿转来，哪能办呢？侬倒也可以清清爽爽像我一样做个福气人哉！

（婆白）这个女人倒促狭咧！

（婶白）不过闲话要讲转来,难道叫我伲必大一辈子不回娘家？

（婆白）格是还有我婆阿妈。

（婶白）本来侬也可以发放。

（婆白）婶娘,勿是我勿放，一家自有一家格难处,听我说——

（唱）叫声婶娘女亲家，自家人叹叹苦处也不碍啥。我领?必大不大容易，东合会，西借债。自从必大到我家，时不好来运勿佳,公阿爹生意勿顺利，猪猡瘟死一大排,外加多了必大一个人吃饭，所以又空了一些零碎债。幸亏今年田里收成好，纱好纺来布好卖，让伊必大帮助公阿爹,做些生活还脱一些零碎债。

（婶唱）亲家姆侬讲来好听伐，说啥为伲必大空了一身债。小姑娘过门做媳妇，我茶礼勿曾受过啥,必大虽小不是吃闲饭，帮?早晨做到夜,侬婆阿妈总有一天归天去，也巴望有个小辈到侬灵前拜几拜。我要领必大回家住几日，侬推三托四算个啥？老古话，香客不断杭州路，女儿是好回娘家。必大是到李家做媳妇，勿曾当啥货物卖。

（婆唱）老古话，香客不断杭州路，女儿是好回娘家。只不过必大身上呒啥着，破破烂烂回去像个啥,被人家看见笑话伐？不会说侬做婶娘的勿像样，坍台要坍我婆阿妈。

（婶白）那是?李家的场面。

（婆白）是呀！

（唱）既然一定要回娘家，我看还是迪能吧，今年头里来勿及，待等明年三春外，让我坌起田来,下起种来，脱起草来,捉起花来,纺起纱来，织起布来,染起来，做起来，做格两件新衣裳,让伊着仔像像样样回娘家。

（婶白）呸！

（唱）侬勿要牙齿嚼蛆舌头滚，这种长脚闲话勿中听。姑娘不断娘家路，说到天边讲得赢。一定要领伊回转门，今朝勿肯也要肯！

（婆白）呸！

（唱）笃笃叫，慢慢能，老古闲话到如今，嫁出去女儿泼出水，推岀日头早关门。媳妇吃了婆家饭，由我作主听我命，侬要领伊回家转，不答应来不答应。

（婶唱）笃笃叫，慢慢能，侬迪个女人真猛门，有理走尽天边路，无理寸步也难行，我只出一张红八字，未曾写过卖身文。

（白）必大，走！

（婆白）敢走！

（必白）啊！婶娘……

（婶白）必大，勿要怕！啥人敢在侬身上碰缺半根汗毛，婶娘叫伊搭起三脚架子呵直！

（婆白）侬勿要一本正经,勿要在关老爷面前使大刀！

（婶白）侬勿要在张天师面前鬼画符！

（婆白）我是晓得侬格！

（婶白）晓得啥？

（婆白）晓得侬格威名！

（婶白）我也晓得侬格大号！

（婆白）啥大号？

（婶白）啥威名？

（婆白）侬是毒……

（婶白）侬是雌……

（婆白）雌啥？

（婶白）毒啥？

（婆白）毒……独个子人。

（婶白）死脱当家人,本来就是独个子人。

（婆白）啥叫雌？

（婶白）雌……雌亲家姆。

（婆白）亲家姆本来是雌，哪里来雄的！

（婶白）留留侬面子！

（婆白）我是蟹养出来，不要啥面子，额角头下面就是下巴,侬只毒夹剪！

（婶白）侬只雌老虎！

（婆白）好，我活了四十多岁，呒没人当面叫我,今朝侬来叫我雌老虎，我就叫侬尝尝老虎脚爪格味道！勿算格，我踏着一笃鸡屙一滑！

（婶白）好！侬来！

（婆白）侬蜡烛不点不亮！

（婶白）侬勿见棺材勿哭！

（婆白）侬不吃生姜勿晓得辣！

（婆白）救命！

（婶白）再敢凶伐？

（婆白）勿凶了！

（婶白）放必大回去？

（婆白）格是勿放！

（婶白）放哦？

（婆白）放！放格！

（婶白）就饶了侬！

（婆对必大）死货色！养了侬十多个月，侬强解劝。唉！婆婆要受媳妇气，天下哪有迪种理，死货色,侬走！

（婶白）就走？呒没迪能便当，就叫伊拖一片挂一块回娘家吗？现在侬倒不怕坍侬婆阿妈格台啦？

（婆白）破衣裳是?娘家带来格！

（婶白）哼！必大替?做了十多个月，连衣裳也不添一件，办不到！

（婆白）哪里来？做起来也来勿及！

（婶白）必大，有哦？

（必白）有格，我进来辰光穿格新衣裳，第三天就剥下来锁在箱子里。

（婆白）啊！侬倒是螃蜞裹馄饨里戳出。

（婶白）去拿出来！

（婆白）勿要做梦！

（婶白）拿勿拿？

（婆白）拿，拿。今朝碰着强盗抢啊！

（婶白）侬讲啥？

（婆白）呒没讲啥。

（婶白）替必大穿。

（婆白）婶娘,侬迪能格勿讲理啦？世界上哪有婆妈服侍媳妇格道理！

（婶白）道理？婆妈打媳妇，女儿不许回娘家,养媳妇勿当人看待,格道理是啥人定格？侬会讲理,就不会打人啦，快替必大着！

（婆白）唔，来着啊,死货色（偷偷扭了必大一把）

（必白）喔唷！

（婶白）做啥？侬又在阴损伊啦？

（婆白）天地良心，我替伊拍脱些灰尘。

（婶思量自语）不好，必大今朝跟我回去，将来免不了仍旧要到婆家来。老太婆今朝在我手里吃了亏，一定会在必大身上翻本，将来倒害了必大。

（必白）婶娘，好回去了。

（婶白）虽则跟婶娘回去，最多不过住十天半月，迟早要回婆家，侬去回头一声，消消伊格气。

（必白）婶娘，我跟侬回去，哪怕饿死也不愿再到李家来啦！

（婶白）想想必大要吃苦末，真是心酸。必大，红八字在人家手里,不好跟婶娘一辈子,今朝去回头一声,将来格事往后再讲。

（必白）唔！

（婆白）哼！李家格媳妇，不怕伊在陆家过一世。天上飞格鸟，总有一天到地上来寻食吃！

（必白）婆阿妈……我跟婶娘回去啦！

（婆白）啥人要觅侬迪颗宝！老古话讲，媳妇不是宝，有了铜钿就好讨。侬跟婶娘回去，有力量侬一世不要回婆家来。侬再踏进李家门口，养媳妇不会当太婆看待！哼，红八字在我手里！

（婶白）侬倒是勿受人抬举,本来我想领必大回去住几日就送来，现在爽快对侬讲,去了勿来啦！侬勿服，随便叫啥人来,带了红八字,到了小茶馆里，四方台子八方站，来评一评看！评出理，必大回来，评勿出理，一生一世勿来了！

（婆白）死货色，看！跳跳蹦蹦开心来！侬算走啦？看侬跑得出李家门口！

（唱）苦啊苦，我年纪活到四十岁，第一次碰到迪格顶头货。